sina lukin ala lukin e musi "mun seli pi lon ala" (Phantasy Star / ファンタシースター)?

jan utala pi nasin lawa: "jan pi ma tomo Kamini o, jan lili ni li moli. o utala ala e nasin pi jan lawa Lasiku!"

jan Alisa: "jan Nelo o, seme li kama?"

jan Nelo: "jan sama mi Alisa, o kute. jan Lasiku li ante mute. nasin sin li ante taso ala."

"jan ike ale en pimeja pi lon mi li tan ona. mi lukin sona e ijo, taso sona mi li ike tawa jan lawa. o pini e jan lawa Lasiku. sina pali ala e ni la, pimeja li lawa e kulupu mun. o alasa e jan pona. sina wan taso la, sina wawa ala."

"jan Talon li wawa mute. mi lukin utala lon poka ona. taso, mi ken ala alasa e ona. jan Alisa o, o alasa e jan Talon. o pini e jan Lasiku. o weka e utala tan kulupu mun. mi pana e wile suli tawa sina... moli mi la, sina wan taso.... mi pilin ike tan ni..."

jan Alisa: "jan Nelo o... mi wile pali tawa ni: moli sina li tan ala ala. mi wile utala. mi wile awen e ma tomo mi. o awen e mi a! kon sina li lon poka mi la, wawa pi jan Lasiku li suli ala a."

musi mute pi tenpo pini la, jan musi li lawa e jan mije. jan meli li pali e lili. musi ni la, jan meli li lawa e kulupu utala sina, li kama wawa mute, li utala tan moli pi jan mije.

jan utala: "o awen lon ma tomo. ma ante li ken ike e jan."

pilin mi la, len ona li lukin sama len pi jan utala ike tan sitelen tawa "utala pi mun seli" (Star Wars).

"ma insa" pi musi ni la, nasin lukin li ante. sina lukin ala e ma tan sewi. sina lukin tan insa. nasin ni li pona lukin. taso, ni li pali mute: o awen sona e nasin ma.

jan sona: "sina sona ala sona e mun ale pi kulupu mun Ako?"

"mun tu wan li lon. ona li ante mute. mun ni li mun Pama. ona li jo e kasi mute, e laso mute."

"mun Motawija li jo e ko jelo taso. mun Tesoli li lete mute. lon lili li lon ona. jan lawa Lasiku li ike tawa mun ale. tenpo suno kama ale la, wile ona li ike e ijo."

jan pi ma tomo Kamini: "sina ken kama jo e ijo mute lon ma tomo esun. tenpo pini la, mi kama jo e lipu jan pi sona ike a!"

jan (ante) pi ma tomo Kamini: "mi weka tan tomo mi la, kulupu utala pi jan Lasiku li lukin e tawa ale mi. tenpo pini la, ma tomo Kamini li pona mute. ale li kama ike kepeken nasin seme?"

tomo sewi li ken weka e jan tan moli. sin la, ona li toki e ni: sina wile suli e wawa sina la, nanpa sona seme li wile?

jan pi ma tomo Paloli: "sina wile tawa ma tomo esun la, ma tomo Sion li lon nasin pi open suno."

jan Alisa li kama sona e wawa nasa. ona li ken pona e sijelo.

jan pi ma tomo Paloli: "tomo pi tomo tawa mun li ken tawa ma tomo Pasejo. ona li ma tomo tawa pi mun Motawija. mi wile tawa lon tenpo kama. mi weka ala tan mun ni lon tenpo pini a!"

jan Alisa li ken ala tawa tomo pi tomo tawa mun. jan utala li wile lukin e lipu jan ona.

jan pi ma tomo Sijon: "o kama pona tawa ma tomo Sijon. ni li ma tomo pi esun mute nanpa wan lon mun Pama... lon tenpo pini. nasin pi tenpo ni la, esun lili li lon."

jan ante pi ma tomo Sijon: "tenpo pini la, jan Talon li lon ni. ona li tawa nasin seli, li wile moli e monsuta Metusa. mi lukin ala e ona lon tenpo ni. soweli li lon poka ona. soweli ni li ken toki a! ona li jo e poki misikeke."

jan #3 pi ma tomo Sijon: "mi alasa e soweli toki lon ma anpa pi monsuta Metusa. mi esun e ona tawa jan esun lon ma tomo Pasejo. mi kama jo e mani mute tan ni a!"

"mi wile kama jo e ijo pi sona len."

#1: "mi esun ala e ona. o weka."
#2: "o pini. mi esun ala e ijo ike."
#3: "a... sina wile ala pini. o jo e ona."

jan esun: "ni li lipu pi ken tawa. sina kama jo e ona tan mi ala. sina sona ala sona e ni?"

jan pali: "o kama pona tawa tomo pi tomo tawa mun pi mun Pama. tomo tawa ale li tawa ma tomo Pasejo. ona li ma tomo lawa pi mun Motawija."

jan utala: "sina jo ala jo e lipu jan?"
jan Alisa: "jo ala."
jan utala: "sina wile jo e lipu jan. o tawa ala. sina tawa la, mi utala!"

jan pali: "sina wile ala wile jo e lipu jan?"
jan Alisa: "wile."
jan pali: "mi wile sona e ijo ni tan nasin. sina pali ala pali e ijo ni: ona li ike tawa nasin lawa?"
jan Alisa: "pali ala."
jan pali: "sina jo ala jo e ike sijelo ni: ona li ken tawa jan ante?"
jan Alisa: "jo ala."

jan pali: "pali ni li wile e mani Meseta 100. sina ken ala ken pana e mani?"
jan Alisa: "ken."
jan pali: "pona a! o jo e lipu jan. o awen e ona lon tenpo ale."

Sign in to participate in the conversation
toki.social

toki! ni li kulupu pi toki pona lon ilo Masoton. o kama!